પૂજ્યપાદ આચાર્ય ભગવંત શ્રીમદ્દ વિજય આનંદઘનસૂરીશ્વરજી મહારાજ નો જન્મ વિ.સં. 1977 શ્રાવણવદ-5 ને તા. 23/8/1921 ના રોજ રાજસ્થાનમાં સિરોહીનાં પાલડી (એમ.) ગામમાં પ્રભાત સમયે થયો હતો. પિતાશ્રી ચતરાજી પનાજી પરમાર અને માતા કંકુબાઇ એ બાળકને ચુનીલાલ તરીકે આવકાર્યું. પરંતુ ચુનીલાલે માત્ર દોઢ વર્ષની ઉંમરે માતાનો ખોળો ગુમાવતાં તેમનો ઉછેર ચતરાજીનાં મોટા ભાભી ચમનીબાઇએ કર્યો. નાની વયમાં જ ચુનીલાલ સામાયિક, પ્રતિક્રમણ, પૌષધાદિ વ્રત નિયમનું પાલન કરતાં. જોધપુર રાજસ્થાનનાં બગડીનગર નાં રહેવાસી શ્રી લાલચંદ ચંદનમલજીનાં ધર્મપત્નિ સૌ. લક્ષ્મીબાઇએ ચુનીલાલને 16 વર્ષની ઉંમરે ખોળે લીધા. અહીંથી તેઓ વ્રતનિયમનાં ચુસ્ત પાલન સાથે મુંબઇ મુકામે પહોંચ્યા. મનમાં સતત ધર્મનું રટણ કરનાર ચુનીલાલનું હ્રદય વૈરાગ્યનાં રંગે રંગાયું અને વિ.સં. 2008 અષાઢ સુદ-14નાં રોજ પ.પૂ. આ. દેવ શ્રીમદ્ વિજયભુવનસૂરીશ્વરજી મ.સા.નાં સાનિધ્યમાં દીક્ષા ગ્રહણ કરી પૂ. મુનિ શ્રી આનંદઘન વિજયજી મ.સા. બન્યા.

મુનિજીવનનાં પ્રારંભથી જ તેઓએ પોતાનાં ગુરુદેવ પાસેથી ન્યાય, કર્મગ્રંથ, પ્રકરણાદિ તથા આગમ શાસ્ત્રોનું જ્ઞાન પ્રાપ્ત કર્યું તથા જ્યોતિષ, તંત્ર, યંત્રજ્ઞાનમાં પારંગત બન્યા. જૈનશાસનની રક્ષા કાજે તેમ જ આત્મ કલ્યાણાર્થે પૂજ્યશ્રીએ અનેક અશક્ય કહી શકાય તેવાં તપ કર્યાં અને ઇડર, તારંગાજી, ગીરનાર, મા. આબુ ખાતે અચલગઢ જેવાં ગાઢ જંગલોમાં ગુફાઓનાં એકાંતમાં જપ-તપ, આરાધના અને સાધના દ્વારા અનેક સિદ્ધ કર્યા, તેથી જ તેઓને વાચનસિદ્ધ તરીકે પણ ઓળખાતા હતા.